Қаланың мәдени жүрегі
![](https://visitalmaty.kz/wp-content/uploads/2022/07/Кастеев-1-scaled.jpg)
Бүгінгі таңда Мемлекеттік өнер мұражайы — Қазақстандағы ең үлкен көркемөнер мұражайы әрі бейнелеу өнері саласындағы ғылыми-зерттеу орталығы. Қазақтың даңқты суретшісі Әбілхан Қастеевтің есімі мұражайға 1984 жылы ғана беріліп, галереяға орталық кіреберістің алдында оның ескерткіші орнатылды.
Таңғажайып көркем коллекция
![](https://visitalmaty.kz/wp-content/uploads/2022/07/Кастеев-2.jpg)
Мұражайдағы экспонат атаулының барлығын егжей-тегжейлі қарағыңыз келсе, онда ішпей-жемей, ұйықтамай, көз үзбей тамашаласаңыз да, бір аптадан көп уақыт жұмсайтыныңыз анық. Өйткені мұражай коллекциясында 23 мыңнан астам бірегей картина, мүсін, қолданбалы өнер туындылары бар. Басты экспозиция 2 қабаттан, 11 зал және 10 галереядан тұрады. Келушілер қазақ бейнелеу өнерінің қалыптасу және даму тарихынан жүйелі түрде хабардар болуы үшін экспонаттар хронологиялық ретпен орналастырылған.
Белсенді ағартушылық қызмет
![](https://visitalmaty.kz/wp-content/uploads/2022/07/Кастеев-3.jpg)
Мұражай уақытпен тыныстас дамып келеді деуге болады. Негізгі экспозициядан тыс, мұнда қазақстандық және шетелдік суретшілердің, фотосуретшілердің, мүсіншілердің, сондай-ақ басқа да өнерпаздардың көрмелері жиі өткізіледі. Жасы мен қызығушылығы әр түрлі өнер өкілдерінің әлеміне тарта, музей ашық лекциялар, интерактивті шаралар және тақырыптық экскурсияларды үзбей ұйымдастырып отырады.